Yeni tədris ilinin başlaması ilə əlaqədar Sədərək rayon 1 nömrəli tam orta məktəbində tədbir keçirilmişdir.

Tədbiri giriş sözü ilə açan Sədərək Rayon İcra Hakimiyyətinin başçısı Naim Cahidzadə yeni tədris ilinin başlanması münasibətilə hər kəsi təbrik edib və bildirib ki, Sədərək rayonunda 600-dən yuxarı bal toplayaraq ali təhsil müəssisələrinə qəbul olunan məzunların sayı ildən-ilə artmaqdadır. Təşkil olunan tədbirin məqsədinin də şagirdləri təhsilə həvəsləndirmək, ölkəmizin sağlam və etibarlı gələcəyi naminə faydalı, təhsilli gənclər yetişdirmək olduğunu diqqətə çatdıran Naim Cahidzadə məktəblilərə sağlam və vətənpərvərlik ruhunda böyüməyi, sağlam biliklərə yiyələnməyi tövsiyə edib, təhsildə uğurlar arzulayıb. Həmçinin, Azərbaycanın ərazi bütövlüyü uğrunda canından keçən şəhidlərimizin övladlarına mənəvi dəstək göstərməyin, onlara cəmiyyətin diqqət və qayğısını hiss etdirməyin hər kəsin vətəndaşlıq borcu olduğunu diqqətə çatdıran rayon rəhbəri qeyd edib ki, şəhidlərin geridə qoyduğu əmanətlər bizim məsuliyyətimizə, öhdəliyimizə çevrilməlidir.

Daha sonra Rayonun Təhsil şöbəsinin müdiri Sirac Qarayev çıxış edərək bildirib ki, ölkəmizdə Bilik Günü kimi qeyd edilən 15 sentyabr hər bir məktəblinin və valideynin həyəcanla gözlədiyi bir gündür. Bütün dünyada olduğu kimi, ölkəmizdə də yay tətili ilə əlaqədar yaranmış fasilə ilə bağlı şagirdlər məktəbdən bir müddət ayrı qaldıqları üçün həmin gün daha həyəcanlı olurlar. Onlar doğma siniflərinə, məktəblərinə yenidən qovuşduqları üçün sevinirlər. Sirac Qarayev "Bilik Günü" münasibətilə müəllim və şagirdləri təbrik edib. Sonda məktəbdə siniflərə baxış keçirilib və dərslərdə iştirak edilib.