27 Sentyabr - Anım Günü ilə əlaqədar olaraq Sədərək rayonunda şəhid ailələri ziyarət olunub.
Prezident İlham Əliyev tərəfindən respublikanın bütün bölgələrində şəhid ailələrinə və qazilərə hər zaman yüksək diqqət və qayğı göstərilir, onların problemlərinin həlli istiqamətində müvafiq addımlar atılır.
“27 Sentyabr – Anım Günü” ilə əlaqədar Sədərək Rayon İcra Hakimiyyətinin başçısı Naim Cahidzadə Sədərək kəndində Şəhid Fazil Zamanov və Şəhid Qasımov Əhmədin ailələrini ziyarət edib. Ziyarətdə həmçinin rayon icra hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Müşfiq Məmmədov, Yeni Azərbaycan Partiyasının Sədərək rayon təşkilatının sədri Arif Qasımov, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Naxçıvan Muxtar Respublikası üzrə baş idarəsinin Sədərək rayon bölməsinin rəisi Nüsrət Vəliyev iştirak ediblər.
Çay süfrəsi ətrafında keçirilən görüşdə çıxış edən rayon rəhbəri 30 ilə yaxın müddət ərzində Ermənistan tərəfindən işğal olunmuş torpaqlarımızın Müzəffər Ali Baş Komandan və Qəhrəman Ordumuzun şücaəti sayəsində 44 gün ərzində azad olunduğunu bildirib. İcra başçısı onu da vurğulayıb ki, bu gün bizlər həmin Vətən oğullarının sayəsində fəxrlə başımızı dik tutaraq gəzirik. Sonra ölkə Prezidenti İlham Əliyevin şəhid ailələrinə və qazilərə diqqətindən söz açan Naim Cahidzadə bu müqəddəs ənənənin davam etdirildiyini söyləyib. Ziyarət zamanı şəhid ailələri şəhidlərlə bağlı xatirələrini bölüşüb, ölkə rəhbərinin bu ailələrə göstərdiyi dəstəyə görə öz minnətdarlıqlarını bildiriblər.
