02.11.2024 tarixində Sədərək Rayon İcra Hakimiyyətinin təşkilatçılığı ilə şəhid Abdullazadə Tağı İlham oğlunun anım günü ilə əlaqədar olaraq Sədərək Rayon Şəhidlər Xiyabanında tədbir keçirilmişdir. Tağı 1992-ci il 5 may tarixində Sədərək rayonunda anadan olmuşdur. 1999-2010-ci illərdə orta təhsilini Sədərək kənd 1 nömrəli tam orta məktəbində alıb. 2010-ci ildə Azərbaycan Silahlı Qüvvələrinin sıralarında müddətli həqiqi hərbi xidmətə çağrılıb. 2011-ci ildə hərbi xidmətdən qayıtdıqdan sonra Sədərək rayon Heydərabad qəsəbə tam orta məktəbində hərbi müəllimi vəzifəsində işləyib. 2019-cu il Azərbaycan Respublikası Müdafiə Nazirliyinin tabeçiliyində olan və qərargahın nəzdində fəaliyyət göstərən Xüsusi Təyinatlı Qüvvələrin 3 aylıq təlim kursuna qəbul olunub. Kursu bitirdikdən sonra Xüsusi Təyinatlı Qüvvələri sırasında xidmət edib. Azərbaycan Ordusunun xüsusi təyinatlısı olan Tağı Abdullazadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində Füzuli və Hadrut istiqamətində gedən döyüşlərdə olub. Tağı Abdullazadə noyabrın 2-də Hadrutun Tuzluca istiqamətində gedən döyüşlər zamanı boğazından aldığı qəlpə yarasından şəhid olub. Qəhraman Şəhidimiz Sədərək Rayon Şəhidlər Xiyabanında dəfn edilib.
